La supra fragmento eldirita de Fidel Castro dum la funebra ceremonio de la viktimoj pro la bombardado okazinta kontraŭ la aera militbazo de San Antonio de los Baños kaj la flughavenoj de Ciudad Libertad kaj Santiago de Cuba, preludo de la milita agreso de “Haveno de la Porkoj”, anoncis al la mondo la 16an de aprilo 1961 la malfermon de la radiaj disaŭdigoj kubaj al la ekstera mondo per kreado de Radio Havano Kubo (RHC), “Amika voĉo kiu trairas la mondon.”

Je la venko de la revolucio en januaro 1959, la malnova revo de la “barbuloj el la Montoĉeno” iĝis kerna tasko por la estraro de la lando: konkretigi la ekfunkciigon de Radio Havano Kubo, la voĉon de popolo en Revolucio, kaj tia, ankaŭ voĉo de ĉiuj kiuj tra la mondo batalas kontraŭ imperiismo kaj favore al memdetermino.

RADIO HAVANO KUBO.

Kvankam oficiale RHC estiĝis la unuan de majo 1961, la ideo krei kuban radiostacion internacian naskiĝis en la Montoĉeno Maestra, dum la fina kampanjo kontraŭ la diktaturo de Fulgencio Batista.

ORIGINO

En la komenco de la jaro 1959, la usonaj informagentejoj ekkomencis sian kampanjon kalumnian kontraŭ la revolucia procezo komencita en la insulo.

Dum tiuj tagoj, kiam oni ekjuĝis la militkrimulojn de la venkita tiraneco, la transnaciaj informagentejoj ektordis la realaĵojn de tiuj faktoj, kaj per raportoj ŝajne objektivaj, ili informis pri ekzekutoj de “politikaj opoziciantoj de partioj de Batista”.

Instigite de misinforma lavango pri Kubo dissendita de AP, UPI kaj aliaj imperiismaj agentejoj, la konservativa gazetaro de la kontinento agitis la supozitan perforton de individuaj liberecoj kaj normojn pri homa kunvivado en la insulo.

La organizitaj kampanjoj kreskis unu post alia. Okazis intense tiaspeca kampanjo en Latinameriko kaj Usono por malamikigi virojn kaj virinojn religiemajn kontraŭ la kuba revolucio. Tiucele oni kalumniis la landon per versioj de persekutoj kaj murdoj kontraŭ pastroj kaj fermo de preĝejoj kaj temploj. Sekvis kampanjo pri “patra aŭtoritato” kaj multaj aliaj tiaspecaj kampanjoj.

La fakuloj pri propagando, dungitaj de la malamikoj de la insula revolucio, ne ĉesis en sia malnobla tasko fabriki novajn kalumniojn pere de siaj informaj agentejoj kaj aliaj potencaj amaskomunikilioj.

Kun la celo kontraŭstari tiun lavangon de mensogoj, Kubo alvokis la konatan “Operacio Vero”. Preskaŭ 400 ĵurnalistoj el la tuta mondo vojaĝis al Havano kaj tiuj, kiuj deziris kaj povis, spegulis la realon de tio kion ili propraokule spertis, kio ne kongruis kun disvastigitaj informoj de la gazetaro, radio kaj televido de la kontinento. Poste, estiĝis la vehiklo kapabla disvastigi la kuban realon: Radio Havano Kubo (RHC).

La unua kaj sola kuba radiostacio je mallongaj ondoj por internacia disaŭdigo, naskiĝis kiel esenca bezono de la Kuba Revolucio: posedi radian instrumenton je internacia skalo kapabla trarompi la informan sieĝon altruditan ĉirkaŭ nia lando flanke de la propagandaj organoj de Usono kaj ties adeptaj reĝimoj kaj alfronti la bone organizitan kampanjon de kalumnioj ellaboritaj de la imperiismo usona.

Komence de 1961, la usona registaro jam estis sukcesinta konsiderinde izoli Kubon de la mondo, speciale de Latinameriko kaj ties popoloj kun kiuj ĉiam ekzistis historiaj, lingvaj kaj kulturaj ligoj, plus ekonomikaj kaj sociaj realoj komunaj.

Ĉiuj propagandaj rimedoj de la imperiismo celis silentigi la ekzemplon de la insula revolucia procezo por la aliaj popoloj. Ili estis subtenataj en tiu celo de la oligarkioj latinamerikaj. Sed kion plian ili volis kaŝi dum tiu tempo per sia informa kaj kultura sieĝo?

Silento estis helpanto por lanĉi agreson kaj krimon, por detrui per milita ago la insulan revolucion kaj ties ekzemplon. Pro tio, dum la kuba popolo sin preparis por defendi sian suverenecon kaj integrecon, jam aŭdiĝis komence de 1961, eksperimente, etajn programojn preparitajn de la unua internacia radiostacio kuba. Per provizora identigo, “Mallonga Ondo Eksperimenta”, aŭdiĝis la kuba voĉo kiu tuj ekgajnis aŭskultantojn eksterlande.

LA VERON ONI NE POVAS KAŜI

Per komenca mesaĝo lanĉita en februaro 1961, malfermiĝis la unua breĉo en la informa sieĝo kontraŭ Kubo. Eta transmisiilo elsendis la unuajn programojn en la hispana lingvo al la regiono de Centrameriko. Finite la eksperimento, la estonta Radio Havano Kubo elpruviĝis en vero dum la milita invado okazinta tra Plaĝo Girón ĉe Haveno de la Porkoj tiun saman jaron.

La 15an de aprilo Radio Havano Kubo informis pri la atakoj kontraŭ tri kubaj flughavenoj cele detrui la malmultajn aviadilojn de la naskiĝanta aera forto kaj tiel faciligi la surteran invadon komencitan du tagojn poste.

Dimanĉe la 16an de aprilo, la radiostacio diskonigis la funebraĵon de la viktimoj kie la ŝtatestro Fidel Castro, dum solena ceremonio deklaris la socialisman karakteron de la kuba revolucio.

La 1an de majo 1961, kiam la popolo publike festis la venkon de Plaĝo girón, oficiale estis inaŭgurita Radio Havano Kubo; tiel komenciĝis kresko-procezo. Ekzistis jam io pli ol la modesta kaj malgranda transmisiilo kiu tute taŭgis por la eksperimenta ondo. Ĝia mesaĝo etendiĝis tra tuta Suda kaj Norda Ameriko, poste kreskis laŭ la tempopaso ĝis dissendi en naŭ lingvoj: hispana, franca, angla, portugala, araba, keĉua, gvarania, kreola kaj esperanto.

Situanta en centra avenuo de Havano, nome Infanta, Radio Havano Kubo dividas sesetaĝan konstruaĵon kun du radiostacioj tutlandaj, Radio Progreso, La ondo de ĝojo, kaj CMBF, Radio Muzika Nacia.

Nuntempe, la elsendoj atingas per 9 lingvoj dum pli ol 30 horoj tage, la tutan mondon, per programoj variaj, esence novaĵoj kaj aliaj gravaj programoj kiuj reprezentas la riĉan trezoron kulturan kaj muzikan de la insulo.

Aŭskulti la ondojn de Radio Havano Kubo signifas eniri en la vivon de popolo kiu konstruadas tagon post tago, sian destinon, sen enmiksiĝoj nek receptoj altruditaj de ekstere.

Senĉesa kontribuo pri novaĵoj al la ciferecaj retoj mondaj.
Radio Havano Kubo ekofertis informojn al la reto jam antaŭ ekzisto de Interreto. En 1992 la departemento de angla lingvo de la radiostacio ekkunlaboris en la konferenco “reg.cuba” de la retejoj igc.apc kun sidejo en Kalifornio, sendante ĉiutage ĉiujn novaĵojn naciajn kaj internaciajn redaktitajn en la angla.

La unua retpaĝo de Radio Havano Kubo inaŭguriĝis okaze de nova datreveno de la radiostacio, la 1an de majo 1997. Tiutempe, aliro al interreto en Kubo estis ege limigita. Tiu unua paĝo estis desegnita de la kolegoj de Blythe Systems, kies sidejo estis en Nov-Jorko, kiu siaflanke gastigis la paĝon en sia propra paĝo konata kiel New York Transfer pri alternativaj informoj.

En 1997, per teknologia pliboniĝo, Radio Havano Kubo ekkreis sian propran retejon kun sidejo en Kubo, en la servilo de Colombus . Tiucele ĝi akiris la domajnon http://www.radiohc.cu

Sekve oni aldonis gravajn sekciojn, servojn kaj disaŭdigon en reala sono per Interreto, tiel ke la radiostacio aŭskulteblas ekde kiu ajn loko.

En septembro 2002 oni redesegnis la paĝon en la samaj kvar lingvoj angla, hispana, franca kaj Portugala kaj oni aldonis retejon pri La Kvinopo, kvin kubaj kontraŭteroristaj batalantoj, en ses lingvoj angla, hispana, franca, kreola, esperanto kaj Portugala.

En aprilo 2003 la retejo de Radio Havano Kubo gajnis la Granda Premion en la 25 Nacia Festivalo de Radio; en 2004 denove la retejo ricevas la Nacian Premion en la kuba festivalo de radiostacioj; nuntempe la cifereca redakcio por interreto de Radio Havano Kubo estas formita de grupo de ĵurnalistoj kaj kunlaborantoj kiuj prizorgas la paĝon ekde frue matene ĝis malfrue vespere, de lundo ĝis vendredo, kaj ankaŭ sabate ekde matene ĝis la sesa posttagmeze. Dimanĉe oni aktualigas informojn aparte gravajn.