Kuba vicministro pri eksterlandaj aferoj Carlos Fernández de Cossio. Foto Arkivo

Havano, jul 3 (RHK) La Prezidenta Memorando pri Nacia Sekureco, eldonita de la usona registaro, konsistigas timigan politikan platformon, kiu pliintensigas la blokadon kontraŭ Kubo, asertis la kuba vicministro pri eksterlandaj aferoj Carlos Fernández de Cossío ĉi-merkrede.

La diplomato aldonis, ke la dokumento servas kiel kovrilo por la agoj, kiujn la Blanka Domo efektivigas aŭ adoptos estontece por kaŭzi suferon al la popolo kaj influi la ekonomion kaj disvolviĝon de la lando en sentemaj areoj kiel turismo, fuelprovizado, elektroproduktado, nutraĵproduktado kaj multaj aliaj.

Aperante en la novaĵprogramo Mesa Redonda, Fernández de Cossío klarigis, ke la dokumento, publikigita la 30-an de junio, reeldonas kaj ŝanĝas similan dokumenton promulgitan en 2017 dum la unua oficperiodo de la respublikana prezidento Donald Trump.

"La reguloj, kiujn ĝi enhavas, estis efektivigitaj de kiam la prezidento revenis al la povo en 2025, kaj ambaŭ memorandoj portas la influon de la ŝtatsekretario  Marco Rubio kaj kliko, inkluzive de teroristoj, kiuj vivtenas sin per la komerco de malamikeco kontraŭ Kubo," li deklaris.

Li konsideris, ke la Memorando malkaŝas intencon ataki la privatan sektoron de la insulo kaj minaci individuojn kaj kompaniojn, kiuj laŭleĝe eksportas al la kariba lando el Usono.

La vicministro pri eksterlandaj aferoj Carlos Fernández de Cossío deklaris, ke estas tre cinike, kiam ili diras, ke la problemoj de Kubo estas la problemoj de la kuba registaro, kiam oni scias la rektan rilaton inter tiuj reguloj kaj la mankoj, kiujn spertas Kubo.

Fernández de Cossío asertis, ke la vera filozofio de la ekonomia milito, kiun Usono decidis konduki kontraŭ Kubo antaŭ jardekoj, troviĝas en la memorando de Lester Mallory de 1960 kaj la Leĝo Helms-Burton de 1996.

Li citis paragrafojn el ambaŭ juraj dokumentoj, kiuj implice esprimas la decidon de la usona registaro kaŭzi malfacilaĵojn kaj malkontenton inter la kubanoj por detrui la Revolucion kaj transpreni la landon.

Li ankaŭ priskribis la efikon de la blokado sur la insulo kiel severan, ĉar "ĝi kaŭzas damaĝon kaj angoron, sed ĝi ne povis, kaj ne povos, atingi la deziratan finon, ĉar ĝi kolizias kun la decido de la kubanoj konservi sian sendependecon," li asertis.

Fonto: TV-programo Mesa Redonda