Havano, jul 4 (RHK) Kubo havas mision: ke ĝia popolo vivu en prospera kaj justa socio, kun engaĝita registaro kiu aŭskultas kaj agas por transformi defiojn en ŝancojn, kune kun sia popolo.

En ĉi tiu klopodo, la Komunista Partio de Kubo, kiel la supera gvida politika forto de la socio kaj la Ŝtato, laŭ Artikolo 5 de la Konstitucio — kiu difinas ĝin kiel "sola, marti-a, fidelisma, marksisma kaj leninisma, organizita avangardo de la kuba nacio, subtenata de sia demokratia karaktero kaj konstanta ligo kun la popolo" — havas la plej grandan respondecon.

Kun ĉi tiu gvidantaro, hodiaŭ kaj morgaŭ, okazos la 10-a Plena Kunsido de la Centra Komitato, kiu garantias la kontinuecon de la Revolucio kaj la unuecon de la kubanoj ĉirkaŭ la revolucia kaj socialisma projekto.

Ĉi tio okazas en tempo kiam la malamikeco de la nuna usona registaro denove streĉas la ŝraŭbojn al la maljusta kaj arkaika ekonomia, komerca kaj financa blokado, kiu, dum pli ol ses jardekoj, provas doni la finan baton al la Revolucio, kiu, defendata de sia popolo, daŭre batalas, rezistas kaj triumfas por sia suvereneco kaj sendependeco.

La tagordo de la 10a Plena Kunsido analizos gravajn ekonomiajn kaj sociajn aferojn, kiuj rekte efikas sur la loĝantaron, kiel ekzemple la planon stabiligi la Nacian Elektrosistemon kaj nutraĵproduktadon.

La partian kunvenon antaŭas intensa laboro farita de la ĉefa partia gvidantaro per turneoj kaj vizitoj al la teritorioj, kio plifortigas la laboron de la organizo kaj konfirmas ĝian engaĝiĝon daŭre trakti la ĉefajn zorgojn de la popolo, kiel prioritaton.

Ankaŭ estos reviziita la Registara Programo por korekti misprezentojn kaj stimuli la ekonomion, same kiel la plenumo de la kadra politika strategio, aprobita en la 2a Plena Kunsido, por ĝia efektivigo en la periodo 2021-2026.

Aliaj analiztemoj inkluzivos pligrandigon kaj diversigon de la eksteraj enspezoj de la lando; regrandigon kaj disvolviĝon de socialismaj ŝtataj entreprenoj kaj la komplementan rolon de aliaj ekonomiaj agantoj; plibonigon de strategia administrado por teritoria disvolviĝo; fortigon de registara administrado; firmigon de sociaj politikoj por protekti vundeblajn individuojn, familiojn, domanarojn kaj komunumojn; efektivigon de ĝeneralaj gvidlinioj por preventi kaj redukti krimon, korupton, kontraŭleĝecon kaj socian sendisciplinon; efikan administradon de scienco kaj novigado, socia komunikado kaj cifereca transformo por antaŭenigi disvolviĝon kaj plibonigi registaran administradon; kaj traktadon de la racia uzo de energio kaj civitana partopreno.

Fonto: Granma