La usona registaro profitis la bezonon de vizo aŭ vojaĝpermeso por malhelpi Kubon partopreni en la 62-a Direkta Konsilio de la Tutamerika Sanorganizo (PAHO), kiu komenciĝis la antaŭan tagon en Vaŝingtono.
“Ĉi tiu ago konsistigas diskriminacian traktadon kontraŭ Kubo, lando kiu estas plena kaj aktiva membro de PAHO,” diris Tania Margarita Cruz, unua vicministrino pri publika sano kaj doktorino pri medicinaj sciencoj.
La vicministrino kondamnis, ke la usona registaro “profitis la bezonon de vojaĝpermeso por malhelpi mian partoprenon kiel estro de la kuba delegacio al la Direkta Konsilio de PAHO, kies laboro komenciĝis ĉi-lundon.”
Ili ankaŭ rifuzis vizon al alia membro de la delegacio, diris la kuba vicministrino, kiu estas en Novjorko kiel parto de la delegacio partoprenanta la Altnivelan Segmenton de la 80-a Sesio de la Ĝenerala Asembleo de UN.
“Anstataŭ ol plenumi siajn devojn kiel Gastiganta Lando, Usono utiligas ĉi tiun statuson por provi silentigi Kubon, konsciante ke ĝi ne havas legitimajn argumentojn por malkonsenti kun niaj pozicioj,” ŝi aldonis.
D-rino Cruz emfazis, ke Kubo ne estas nur aktiva lando en la kadro de la PAHO. “Ĝi estas la nacio, kiu plej multe kontribuis en la hemisfero al garantiado de sanserva kovrado je la regiona nivelo,” ŝi emfazis.
Miloj da kubaj kuracistoj kaj profesiuloj, ŝi argumentis, provizis kaj daŭre provizas sanservojn en la plej multaj landoj de la regiono; krome, miloj da kuracistoj, diplomiĝintoj kaj santeknikistoj el latinamerikaj kaj karibaj nacioj, same kiel Usono, estis trejnitaj en Kubo.
La oficistino avertis, ke estas absurde senigi la Organizon je la ĉeesto kaj rekta partopreno de Kubo en ĝiaj konsideradoj, kiam Kubo havas tiom multe por kontribui en teknikaj aferoj, strategioj kaj sanpolitikoj.
“Dum jardekoj, Kubo havis publiksanajn politikojn, strategiojn kaj programojn, kun vasta akumulita sperto, kiuj estis aprobitaj kaj laŭditaj de la Monda Organizaĵo pri Sano (MOS) kaj PAHO mem,” ŝi finis.
La Direkta Konsilio de PAHO kunvenas unufoje jare. Ĝia laboro finiĝos venontan vendredon, la 3-an de oktobro.
Fonto: PL
