Ĉi-semajne, daŭrigante lastatempan tendencon, la Usona Ŝtata Departemento anoncis novan vicon da punaj rimedoj kontraŭ kubaj registaraj oficistoj kaj entoj, kadre de la politiko de sieĝo kaj kolektiva puno, kiun Vaŝingtono aplikas kontraŭ Havano.
La individuaj sankcioj celas tri altrangajn oficistojn de la Kuba Instituto de Amikeco kun la Popoloj (ICAP): ĝian prezidanton, Fernando González Llort; ĝian unuan vicprezidanton, Noemí Ramona Rabaza Fernández; kaj la direktoron pri Nordameriko, Leima Martínez Freire. Ĉiuj tri estis aldonitaj al la listo de “Speciale Nomumitaj Naciuloj” (SDN).
Informa dokumento de la departemento — gvidata de Marco Rubio — notas, ke “Ĉi tiuj nomumoj baziĝas sur la raporto de la Departemento publikigita la 20-an de julio, ‘Kubo: La Ĉefurbo de Komunismo en la 21-a Jarcento’, kiu resumas la jardek-longan uzadon fare de la kuba reĝimo de brigadoj — kiel tiu kunordigata de ICAP (kiu estis nomumita pli frue ĉi-monate) — por antaŭenigi kubajn interesojn koste de Usono.”
Rimedoj estas ankaŭ trudataj kontraŭ entoj ligitaj al la metalurgia kaj minada sektoroj de Kubo, kontraŭ kiuj jam antaŭe estis truditaj rimedoj. Same kontraŭ la ekstera komercado.
Rezulte de ĉi tiu nomumo, ĉiu usona civitano aŭ kompanio estas malpermesita partopreni en komercaj aŭ financaj transakcioj kun la sankciitaj partioj. Krome, oni ordonis frostigon de ĉiuj aktivaĵoj posedataj de la nomumitaj partioj ene de usona teritorio.
Ne-usonaj entoj, kiuj havas rilatojn kun la supre menciitaj kubaj entoj kaj ŝtatanoj, ankaŭ alfrontas eblajn punojn.
(Bazita sur informoj de la Ŝtata Departemento)
Fonto: Cubadebate
