Havano, aŭg 23 (RHK) La Integra Klasifiko de Nutraĵsekureco (IPC) de UN oficiale deklaris malsategon en Gazao hieraŭ, la unuan kiu trafis la Proksiman Orienton, post kiam ĝiaj fakuloj avertis pri la situacio, kiun alfrontas ĉirkaŭ 500 000 homoj loĝantaj tie.
“Post 22 monatoj da senĉesa konflikto, pli ol duonmiliono da homoj en la Gaza-strio alfrontas katastrofajn kondiĉojn karakterizitajn de malsato, mizero kaj morto,” diris UN. La plej malbona okazas en la norda parto de la Strio, precipe en Gaza-urbo, kie vivas unu miliono da homoj, kaj kontraŭ kiu Israelo preparas novan militan ofensivon.
“Ĉi tio estas homfarita katastrofo, morala akuzo kaj fiasko de la homaro,” deklaris António Guterres, Ĝenerala Sekretario de Unuiĝintaj Nacioj.
Laŭ la IPC, la malsatego disvastiĝos de la gubernio Gaza al la gubernioj Deir al-Balah kaj Ĥan Junis en la venontaj semajnoj.
Siaflanke, Israelo neis, ke malsatego ekzistas en la teritorio kaj akuzis fakulojn pri “inventado” de la situacio. Dume, la ĉefministro Benjamin Netanjahu anoncis, ke li aprobos militplanon por preni kontrolon de Gaza Urbo, reprezentante signifan eskaladon de lia “milito” en la enklavo.
