La gvidanto de la franca politika movado La France Insoumise, Jean-Luc Mélenchon, publike kondamnis la retenon de rezervaj partoj destinitaj por la Termoelektra Centralo Antonio Guiteras (CTE) en Matanzas, situacio kiun li atribuis al la efiko de la ekonomia, komerca kaj financa blokado trudita de Usono kontraŭ Kubo.
Laŭ la franca politikisto, la ŝipkompanio CMA CGM rifuzas liveri la ekipaĵon, konsideratan esenca por la funkciado de la ĉefa termoelektra centralo de Kubo, malgraŭ la fakto ke la franca registaro formale promesis sendi ĉi tiujn rimedojn por helpi trakti la kompleksan energian situacion, kiun alfrontas la insulo.
Mélenchon deklaris, ke la rifuzo de la kompanio estas respondo al la prem-etoso kaj timigado provokita de la usona politiko rilate al Kubo kaj kritikis la sintenon de la francaj aŭtoritatoj.
En deklaroj publikigitaj en sociaj retoj, li asertis, ke Kubo estas lando “sieĝata kaj nun rekte minacata de usona milita interveno”, kaj konsideris la senagadon de la franca registaro kiel pruvon de “timo al Trump”.
La politika gvidanto ankaŭ postulis, ke francaj aŭtoritatoj intervenu por devigi la ŝipkompanion plenumi sian devontigon kaj liberigi la retenitajn ujojn.
La plendo venas meze de malfacilaĵoj, kiujn alfrontas la nacia elektroreto de Kubo, kiu estas malhelpata de financaj limigoj, fuelmankoj kaj obstakloj al akiro de partoj, teknologio kaj ekipaĵo pro la plifortigo de la usona embargo.
(Kun informoj de X Kubo)
