Bildo: Cubaminrex

Havano, jul 2 (RHK) La unua sekretario de la Centra Komitato de la Komunista Partio de Kubo kaj Prezidento de la Respubliko, Miguel Díaz-Canel, kondamnis en la socia reto X la adopton de nova plano fare de la usona registaro, kiu plue plifortigas la ekonomian, komercan kaj financan blokadon kontraŭ Kubo.

En sia mesaĝo, la kuba gvidanto priskribis la regularon kiel agreseman agon pelitan de "mallarĝaj interesoj, kiuj ne reprezentas la plimulton" de la usona popolo.

Díaz-Canel ankaŭ avertis, ke la celo de ĉi tiu politiko estas "kaŭzi la plej grandan eblan damaĝon kaj suferon al la kuba popolo", kvankam li certigis, ke, malgraŭ la efiko, "ili ne rompos nin".

Siaflanke, la ministro pri eksterlandaj aferoj Bruno Rodríguez denuncis, en la sama platformo, ke la Prezidenta Memorando kontraŭ la insulo "plifortigas la agreson kaj ekonomian blokadon, kiu punas la tutan kuban popolon kaj estas la ĉefa obstaklo al nia disvolviĝo. Ĝi estas krima konduto kaj malrespektas la homajn rajtojn de tuta nacio," li skribis.

En nova memorando eldonita ĉi-lunde, la usona prezidento Donald Trump ĝisdatigis sian politikon rilate al Kubo, eldonante regulojn similajn al tiuj de sia unua oficperiodo, inkluzive de la efektivigo de leĝa malpermeso de turismo de sia lando al la kariba nacio kaj aliaj agoj damaĝaj al la ekonomio.

Fonto: ACN